இந்தக் கட்டுரை, அந்நாள் அதிகாரப்பூர்வ அறிவிப்புகள், பத்திரிகைச் செய்திகள், பின்னர் வெளிவந்த மாற்று விளக்கங்கள் ஆகியவற்றின் அடிப்படையில், சம்பவத்தை ஒரு வரலாற்றுப் பார்வையில் தொகுக்கிறது.
1. அதிகாரப்பூர்வ அறிவிப்பு
1989 நவம்பர் 14 ஆம் தேதி வெளியான தினமின பத்திரிகை, “ரோஹண விஜேவீரா சுட்டுக் கொல்லப்பட்டார்” என்ற தலைப்பில் செய்தி வெளியிட்டது.
அந்நாளைய வெளிவிவகார மற்றும் பாதுகாப்பு அமைச்சராக இருந்த ரஞ்சன் விஜேரத்ன, விஜேவீர உலப்பனையில் கைது செய்யப்பட்டு, விசாரணைக்காக கொழும்புக்கு கொண்டு வரப்பட்டதாக தெரிவித்தார்.
அமைச்சரின் விளக்கப்படி:
உடல் அவசரச் சட்டத்தின் கீழ் உடனடியாக தகனம் செய்யப்பட்டதாகவும், குடும்பத்தினர் யாரும் தகனத்தில் பங்கேற்கவில்லை என்றும் தெரிவிக்கப்பட்டது.
மேலும், விஜேவீரா இளைஞர்களிடம் வன்முறையை நிறுத்துமாறு வேண்டுகோள் விடுத்த குரல் பதிவு இருந்ததாகவும் அறிவிக்கப்பட்டது. இந்தச் சம்பவம் குறித்து விசாரணை நடத்துமாறு அந்நாள் ஜனாதிபதி ஆர். பிரேமதாசா உத்தரவிட்டதாகவும் கூறப்பட்டது.
2. எழுந்த சந்தேகங்கள்
அமைச்சரின் விளக்கத்தில் பல கேள்விகள் எழுந்தன. விஜேவீர ஒற்றுக்கேட்டின் அடிப்படையில் கைது செய்யப்பட்டாரா என்ற கேள்விக்கு “அப்படியாக இருக்கலாம்” என்ற பதில் வழங்கப்பட்டதாக கூறப்பட்டது.
BBC World Service இலங்கை நிருபர், வெளியிடப்பட்ட தகவல்களில் உறுதியற்ற அம்சங்கள் உள்ளன என்று குறிப்பிட்டதாக அறியப்படுகிறது.
அன்றைய எதிர்க்கட்சியினர்: அவர் கொல்லப்பட்ட இடம் எது? தகனம் செய்யப்பட்ட இடம் எது? சாம்பல் எங்கு வைக்கப்பட்டது? எனத் தெளிவுபடுத்துமாறு கோரினர்.
3. மாற்று விவரணம் – “அந்தப் பயங்கர இரவு”
பின்னர் வெளியான சில கட்டுரைகளில், 1989 நவம்பர் 13 அதிகாலை 1.35 மணியளவில் விஜேவீர கொழும்பு கோல்ஃப் மைதானத்திற்கு கொண்டு செல்லப்பட்டதாக குறிப்பிடப்பட்டது. அங்கு பெரிய மரம் ஒன்றின் அடியில் கைக்கட்டுகள் போடப்பட்ட நிலையில் அவர் நின்றதாகவும், குழந்தைகளுக்கு எதுவும் செய்ய வேண்டாம் என்று வேண்டுகோள் விடுத்ததாகவும் கூறப்படுகிறது.
பின்னர் துப்பாக்கிச் சூடு நடத்தப்பட்டதாகவும், அதன் பின் உடல்கள் மயானத்திற்கு கொண்டு செல்லப்பட்டதாகவும் அந்த விவரணங்களில் குறிப்பிடப்பட்டுள்ளது.
அதிகாலை 2.40 மணியளவில் உடல்கள் தகனம் செய்யப்பட்டதாகவும், சாம்பல் சேகரிக்கப்பட்டதாகவும் கூறப்படுகிறது.
4. சாம்பலின் மர்மம்
அதிகாரப்பூர்வ அறிக்கைகளில் சாம்பல் குறித்து தெளிவான விளக்கம் இல்லை. பின்னர் பரவிய தகவலின்படி, குடும்பத்தினர் பெறாத சாம்பல் மயானத்திற்கு அருகிலிருந்த ஒரு போதிமரத்தின் அடியில் புதைக்கப்பட்டதாகக் கூறப்படுகிறது. அந்த மரம் இன்று பெரிய மரமாக வளர்ந்துள்ளதாகக் கூறப்படுகிறது.
ஆனால், இந்த விவரங்களுக்கு உறுதியான ஆவண ஆதாரம் பொதுமக்களுக்கு வெளிப்படையாக கிடைக்கவில்லை.
5. வரலாற்றின் திறந்த கேள்வி
இக்கேள்விகளுக்கு ஒருமித்த, சட்டபூர்வமாக உறுதிப்படுத்தப்பட்ட பதில் இதுவரை வரலாற்றில் தெளிவாக நிலைநிறுத்தப்படவில்லை.
இலங்கையின் அரசியல் வரலாற்றில் 1987–89 காலப்பகுதி மிகுந்த கலக்கம் நிறைந்ததாகும். அக்காலத்தின் அரசியல் சூழல், ஆயுத மோதல்கள், அவசரச் சட்டங்கள், மனித உரிமை குற்றச்சாட்டுகள் ஆகியவற்றின் பின்னணியில் ரோஹண விஜேவீராவின் மரணம் நிகழ்ந்தது.
அவரது வாழ்க்கையும், அரசியல் பாதையும், மரணமும் — அனைத்தும் இன்றும் ஆய்வுக்குரியவையாகவே உள்ளன.
அவரது சாம்பல் எங்கு சென்றது என்ற கேள்வி, வரலாற்றின் அமைதியான ஆனால் தீராத புதிராகத் திகழ்கிறது.
(குமாரி ஹேரத் குறிப்பின் அடிப்படையில் தொகுக்கப்பட்டது.)
- தமிழில் | கலைமகன் பைரூஸ்
(அரச அங்கீகாரம் பெற்ற மொழிபெயர்ப்பாளர்)
0 கருத்துகள்:
கருத்துரையிடுக